గురు వ్యాఖ్యనం-28

 

ఓం కామదాయిన్యై నమః

కామదాయిని అనగా ఒకనికి మంచి కోరికలు కలిగేలా చేసి ఆ కోరికలు తీరే లాగా చేసేది అని అర్థము. కామ దాయిని అంటే కేవలం కోరికలు మాత్రమే తీర్చేది అని ఎప్పుడూ అనుకోవద్దు, సరి అయిన కోరిక కలిగేలా చేసి ఆ కోరిక తీరుస్తుంది, కనుక అమ్మవారిని కామదాయిని అని అన్నారు.

అసలు అమ్మవారి గొప్పతనము అక్కడే ఉన్నది. ముందు వీడికి మనసులో పవిత్రమైన కామం వచ్చేలా చేస్తుంది,  అపవిత్రమైన కామం రాకుండా చేస్తుంది. ఆ పవిత్రమైన కామాన్ని నెరవేరుస్తుంది కనుక జగన్మాత కామదాయిని అని పిలవబడుతుంది.

ఈ మంత్రము గొప్ప అనుకూల దాంపత్య జీవితమును మరియు మంచి సంతానమును ప్రసాదించే గొప్ప మంత్రముగా పురాణములు అభివర్ణించాయి.

మంత్ర ప్రయోగము ౼  ఫలితము:

ఒక చిన్న ఇత్తడి లేదా రాగి లేదా వెండితో చేసిన అమ్మవారి రూపులను తెచ్చుకోండి. 

1) కొద్దిగా తులసి రసము తయారు చేసుకోండి. (సాధారణముగా తులసీ ఆకులను చేతితో పిండితే ఆ పసరు వస్తుంది లేదా మిక్సీలో వేస్తే రసం వస్తుంది).

40 రోజులపాటు ఈ తులసీరసమును ఉద్ధరిణితో అమ్మవారి మీద వేస్తూ ఓం కామదాయిన్యై నమః ఓం కామదాయిన్యై నమః ఓం కామదాయిన్యై నమః అంటూ ఈ మంత్ర జపం చేయండి.

40 రోజులపాటు విడిచిపెట్టకుండా ప్రతిరోజూ 1008 సార్లు మంత్ర జపము చేస్తూ అమ్మవారిని తులసీరసంతో అభిషేకించండి.

అనుకూల దాంపత్య సిద్ధ్యర్థం అని సంకల్పంలో చెప్పుకోండి. అన్నీ సంస్కృతంలో చెప్పుకోవడం వీలుకాకపోతే కలిసుండాలని కోరుకుంటున్నాము అని చెప్పుకోండి.

లేదంటే 40 రోజులలో మొదటిరోజు మాత్రం ఒక పురోహితుడిని పెట్టుకుని ఆయన ద్వారా సంకల్పము చెప్పించుకొని జపమును మొదలుపెట్టండి.

ఇలా 40 రోజులపాటు భక్తిశ్రద్ధలతో ఈ మంత్ర అనుష్ఠానము చేస్తే ఎలాంటి కలహాలు కలిగిన దంపతులైనా, విడిపోదాం అనుకున్న దంపతులైనా సుఖంగా కలిసి ఉంటారు.

బయట ఉన్నప్పుడు ఆడవాళ్ళు నాలుగు రోజులు విడిచిపెట్టి ఐదవ రోజు నుంచి చేయండి. మైల వచ్చినప్పుడు ఆడవాళ్ళు, మగవాళ్ళు అయినా జపం చేయకూడదు, మిగతా అప్పుడు నిత్యము కలిసి జపము చేస్తే మరీ మంచిది.

2) సంతాన ప్రాప్తి కోసం అమ్మవారి ప్రతిమను ఆవుపాలతో అభిషేకం చేసి, తరువాత నీళ్లతో శుద్ధిచేసి, తుడిచి బొట్టు పెట్టి, తరువాత ఈ మంత్రమును 1008 సార్లు జపం చేస్తే సంతానం కలుగుతుంది.

తులసీ రసంతో అభిషేకము చేస్తేనేమో అనుకూల దాంపత్యం ఉంటుంది, దంపతులు విడిపోరు, కలిసి ఉంటారు, కలహాల దాంపత్యము కాస్తా కలహాలకు అతీతంగా ఉంటుంది. అదే ఆవు పాలతో అభిషేకం చేస్తే సంతాన ప్రాప్తి కలుగుతుంది. ఇలా 40 రోజులపాటు చేసుకొని ఈ మంత్ర ఫలితమును పొందండి.

సూచన:

గురువుల ద్వారా మంత్రోపదేశం ఉన్నవారు ఓంకారం చేర్చుకుని లేనివారు ఓంకారం లేకుండా జపం చేసుకోవచ్చు.

https://srivaddipartipadmakar.org